香港新浪網 MySinaBlog
« 上一篇 | 下一篇 »
↖天煞疤臉孤星↗ | 8th Feb 2013, 19:58 PM | ※13時事新聞1 | (14 Reads)

送龍迎蛇,爽仔收爐前祝大家新年行好運,做個誠實香港人。年近歲晚,《爽報》好榮幸請嚟「熊人」尖啤幫廣大讀者去有求必應嘅黃大仙祠求籤,誠心上香跪拜之後,提出港人關心嘅10大問題,仲請嚟學咗掌相30幾年嘅黃大仙解籤師傅張瑞明依籤文直說,絕對冇呃人,信不信由你。
吳爽

解籤師傅張瑞明幫尖啤解籤。

劉夢熊會唔會坐監?
 十六號中籤 皇叔遇水鏡
劉夢熊肖鼠,冇絕路,有人幫佢㗎,監就唔使坐,但會好麻煩,是非多。今年3月驚蟄後會有更麻煩嘅事,總之唔好亂咁講嘢啦。

特首或官員會唔會落台?
六十九號中籤 文公祭鱷魚
梁班子好多鱷魚,籤文話北京會派人落嚟平息,應該冇官落台,但梁振英喺6月同12月有非常唔好嘅事發生,12月嗰陣會好麻煩,有可能要走人。

上水站可唔可以光復?
四十六號下籤 左慈戲曹
近排水貨客靜咗啲只係假象,到5月時會打回原形,直頭搞佢唔掂,仲旺過之前,要等到下半年,希望政府做嘢先整番好啲。

有冇其他地區淪陷?
三十七號中籤 東坡遊赤壁
赤壁喺近河嘅位置,就好似上水近深圳河咁,啲水貨客只會喺嗰度,唔會去其他地方,暫時只得上水淪陷,其他區冇咁犀利。

王維基有冇電視牌?
十一號中籤 漢文帝賞柳
王維基𠵱家個心十五十六,成日放唔低,籤文話佢大約7月左右就拎到牌,但呢幾個月都要好似燕子咁四圍撲,搵人幫佢。

亞視會唔會執笠?
六十五號下籤 後主失國
亞視應該捱到明年先可能執笠,可惜救番都好難搞,今年10月仲有可能轉話事人,張籤話後面有女人出主意,有小人搞搞震。

六四有冇得平反?
八號下籤 崔子弒齊君
六四今年唔會平反,喺內地連講都唔得,邊個講平反就邊個遭殃!喺香港嗌媖都仲得,內地嗌就監都有得坐,所以唔好諗嘞。

香港有冇新鮮牛肉食?
三十七號中籤 東坡遊赤壁
香港人梗有鮮牛肉食啦,8月立秋後牛肉仲唔會咁貴㖭,因為有奇蹟出現,搵另一條水買牛,或者政府放寬入口,冬天有平肥牛食。

北韓會唔會核試?
六十號中籤 李白和番書
金正恩一直想再搞核試,但未必有辦法搞得到,佢已經成日催班專家去做,今年未能做到,到2014年4月就有核試危機嘞。

周秀娜有冇新男友?
三十九號中籤 夷齊讓國
周秀娜命帶桃花,就算佢唔吼人,人人都吼住佢,唔驚冇男朋友,唔硬頸可以復合,否則農曆4、8、12月都有姻緣,佢應該最少結兩次婚。

門常開:尖啤求籤指迷津 狼英12月要走人

[1]

周秀娜有冇新男友?

關香港人乜事呀?!

↖天煞疤臉孤星↗
[引用] | 作者 ↖天煞疤臉孤星↗ | 8th Feb 2013 20:03 PM | [舉報垃圾留言]