香港新浪網 MySinaBlog
« 上一篇 | 下一篇 »
↖天煞疤臉孤星↗ | 28th Dec 2012, 14:40 PM | ∩ 歷史●遺蹟 | (6 Reads)

Picture
■83歲創辦人王叔(右)的兒子王宗俠(左)笑說:「爸爸成個慈禧咁垂簾聽政。」梁志永攝

【本報訊】一年將盡,樓價喪升,湮沒幾許半世紀老牌食肆。42年的京滬菜老店北京酒樓,遭業主瘋狂加租,後繼無人;老闆無可奈何,今天上演高朋滿座最後一夜。48年的「港大飯堂」莎厘娜餐廳,經歷迫遷購舖,刻苦經營賣俄菜,面對樓巿瘋癲,家族將老舖以3,920萬易手。

結業在即,老闆三父子,一條心,決覓地延續莎厘娜至下世紀。49年的港式扒房美而廉,老店拆卸重建,屍骨無存;老闆不忿東山再起,變通首賣鬼佬牛扒保招牌。三間老店,三種命運,但說着同一個地產狂潮下的拼搏故事。記者:蔡朗清 林社炳 梁琬珊

莎厘娜餐廳(Czarina)1964年開始在港島半山般含道營業,近月地舖以3,920萬元易手,傳來結業消息,嚇得港大師生紛至來吃「最後晚餐」。言語繙譯系畢業生Shirley昨晚拉着朋友前來喝其有「天下第一湯」之稱的羅宋湯。

店內掛徐立之感謝狀
人稱王叔的83歲餐廳創辦人王殿華,親切地與Shirley說着餐廳與港大的淵源歷史。他感慨說,面對樓巿飆升,家人覺「好價」,決定將店舖賣出,「賣咗間舖,好失落,冇咗個地點同啲熟客老友傾偈」。

王叔嘆喟有因,40年代他在家鄉山東避走共產黨,家人四散孑然一身來港,靠一雙手拼搏打工,積了點錢開麵包店;64年東拼西湊集資在半山般含道25號開設以太太命名的莎厘娜餐廳賣俄國菜。80年代,他又遇上老舖拆卸遷到現址。

他說,那些年的老香港就是這樣拼搏,做食肆要真材實料,要「用個心嚟做」;王叔的心,俘虜了毗鄰的港大師生教職員。店內掛上港大專業進修學院校董會主席張永霖的地圖及對聯、港大校長徐立之的感謝狀,「張永霖成日都嚟食飯,同我傾偈」。

老人家提起往事談過不休,曾因胃癌割了整個胃、從180磅暴跌至只有百多磅的王叔說:「自己最大嘅幸運,係開店48年,到而家都未死,好多老店老闆都唔喺度;另一個欣慰係莎厘娜結業消息傳出,啲老友個個嚟探我。」說到王叔最開心的,應該是兩名兒子王宗豪、王宗俠決定老店明年2月交吉後,覓地再開莎厘娜,「如果兩個仔唔做,莎厘娜就唔做。我知道兩個仔,唔係懶做嘢嘅人」。

新店繼續走懷舊路線
守在身旁的王宗俠笑說:「爸爸好鬼嚴,喺背後指指點點,話自己做生意最叻,成個慈禧咁垂簾聽政」;王叔即回嘴說:「你係我個仔先咁嚴,你要放多啲心落去經營。」他表示,在附近已找到合適舖位,方便熟客光顧,也方便爸爸來打躉,「新店會走番懷舊路線,啲牌匾、雲石椅搬番過去,舊夥計都會請番晒」。王宗俠說三父子一條心,均希望莎厘娜餐廳承傳下去。

教務長韋永庚
港大人講莎厘娜
【一星期三餐】
「60年代已開始幫襯,𠵱家一星期都去三日午餐。套餐70幾蚊唔算貴,最出名係羅宋湯,免治牛肉飯同豬扒飯都好食。希望佢搵到地方搬,可以繼續照顧港大師生。」

地理學系講座教授詹志勇
 【羅宋湯好味】
「近幾年好忙好耐冇去,最出名係羅宋湯,真係好好味,有水準,套餐又好抵,價錢又唔係貴。佢差唔多係區內icon(標記),講開食西餐,都係去Czarina,冇咗就可惜。」

職員協會會長陳捷貴
 【最愛鹹豬手】
「我喺沙宣道醫學院嗰邊返工,都會走去食,幫襯咗20幾年。最愛德國鹹豬手,羅宋湯食到俄羅斯味道。讀書、畢業後敍舊都去。」

地產狂潮淹沒老牌食肆:「港大飯堂」莎厘娜覓舖再拼搏